Kushtet e përdorimit

Në fuqi nga 4 tetori 2026. Këto kushte rregullojnë përdorimin e magusgroup.al dhe të platformave të Magus Group Albania shpk (NIPT L92228018L, Linzë, Nd. 30, H. 31, Ap. 52, Dajti, 1040, Tiranë): Magus ID, Magus Hub me portalin e klientëve, Magus Pay dhe Magus Social. Duke i përdorur, i pranoni këto kushte. Nëse i përdorni në emër të një kompanie, konfirmoni se keni të drejtë t’i pranoni për të.

• magusgroup.al: informacion për grupin, brandet e tij, lajmet, karrierën dhe formulari i kontaktit. Është falas dhe nuk kërkon llogari.
• Magus ID (id.magusgroup.al): llogaria dhe hyrja e përbashkët në platformat tona, e krijuar vetëm me ftesë.
• Magus Hub (hub.magusgroup.al): menaxhimi i shërbimeve, licencave, faturave dhe asistencës për klientët tanë të biznesit, me një portal ku personat e kontaktit të klientëve ndjekin shërbimet e tyre.
• Magus Pay (pay.magusgroup.al): pagesat me kartë për faqet e grupit, përmes shërbimit RaiAccept të Raiffeisen Bank.
• Magus Social (social.magusgroup.al): mjeti ynë i brendshëm, i bazuar në Postiz, për publikimin dhe matjen e postimeve të brandeve të grupit në rrjetet sociale. E përdor vetëm stafi ynë dhe nuk është i hapur për publikun.

Faqet e brandeve të grupit (për shembull autobus.al dhe busmagus.com) dhe shërbimet që shiten në to kanë kushtet e tyre, që zbatohen për ato blerje.

• Llogaritë krijohen vetëm me ftesë. Jepni të dhëna të sakta dhe mbajini të përditësuara.
• Ruajeni të sigurt fjalëkalimin dhe verifikimin me dy hapa dhe mos e ndani llogarinë: përgjigjeni për atë që bëhet me të. Na njoftoni menjëherë në per@magusgroup.al nëse dyshoni se e ka përdorur dikush tjetër.
• Mund të kërkojmë verifikim me dy hapa, të mbyllim sesione ose të pezullojmë një llogari për ta mbrojtur atë ose sistemet tona, dhe ju tregojmë arsyen.
• Kur lidhni një llogari rrjeti social me Magus Social, konfirmoni se keni të drejtë ta menaxhoni dhe se autorizimi që jepni është i juaji.

Nuk lejohet:

• përdorimi i shërbimeve në kundërshtim me ligjin ose me të drejtat e të tjerëve, ose për të dërguar spam apo përmbajtje mashtruese;
• përpjekja për të hyrë në llogari, të dhëna ose sisteme që nuk janë tuajat, për të testuar ose anashkaluar sigurinë e tyre, ose për të ndërhyrë në funksionimin e tyre;
• mbingarkimi i shërbimeve, mbledhja automatike e përmbajtjes së tyre në shkallë të gjerë ose kopjimi i tyre, përveçse kur e lejon ligji;
• ngarkimi i programeve dashakeqe ose i përmbajtjes që cenon pronësinë intelektuale, privatësinë ose të drejta të tjera;
• përdorimi i formularit të kontaktit ose i formularit të fshirjes së të dhënave për qëllime të tjera nga ato për të cilat janë.

Mund të heqim përmbajtje dhe të pezullojmë aksesin që shkel këto rregulla.

Ajo që u ofrojmë klientëve të biznesit (programe, licenca, hostim, asistencë) rregullohet nga oferta, kontrata ose fatura e rënë dakord me klientin; kur ndryshojnë nga këto kushte, mbizotërojnë ato. Pagesat përmes Magus Pay përpunohen nga banka sipas kushteve të saj; ne nuk e shohim kurrë numrin e plotë të kartës. Për një blerje në faqen e një brandi, shitës është ajo faqe, dhe kushtet e saj vendosin për rimbursimet dhe ndryshimet.

Disa funksione mbështeten në shërbime të kompanive të tjera. Kur i përdorni, ose kur lidhni një llogari tuajën me to, pranoni edhe kushtet e tyre:

• YouTube: duke lidhur një kanal YouTube ose duke përdorur funksionet e YouTube përmes shërbimeve tona, pranoni të jeni të detyruar nga Kushtet e Shërbimit të YouTube. Google i përpunon të dhënat sipas Politikës së Privatësisë së Google.
• Meta (Facebook, Instagram, Threads), LinkedIn, X, TikTok, Pinterest, Reddit, Mastodon, Discord, Slack, Dribbble, Medium dhe GitHub: për gjithçka që publikohet në to zbatohen kushtet e tyre të shërbimit dhe rregullat e komunitetit.
• Raiffeisen Bank (RaiAccept): për pagesat me kartë zbatohen kushtet e saj.

Nuk përgjigjemi për mënyrën si funksionojnë ose ndryshojnë këto shërbime. Aksesin tonë në llogaritë tuaja mund ta anuloni në çdo kohë, siç shpjegohet te Politika e privatësisë.

Përmbajtja e faqes dhe e platformave (tekstet, dizajni, programet, logot dhe emrat e brandeve) i përket Magus Group Albania ose atyre që na e kanë dhënë me licencë. Mund ta lexoni, të ndani lidhje drejt saj dhe të përdorni materialet e faqes për mediat siç përshkruhet atje; çdo përdorim tjetër kërkon lejen tonë me shkrim. Përmbajtja juaj mbetet e juaja: na lejoni ta përdorim vetëm aq sa duhet për t’ju ofruar shërbimet.

Punojmë që shërbimet të jenë të disponueshme dhe të sigurta, por nuk mund të garantojmë se do të funksionojnë gjithmonë pa ndërprerje ose gabime. Mund të përditësojmë, ndryshojmë ose ndalojmë funksione, dhe t’i mbyllim përkohësisht shërbimet për mirëmbajtje, duke njoftuar kur është e mundur.

Për aq sa e lejon ligji shqiptar, nuk përgjigjemi për dëme të tërthorta, fitime të humbura ose të dhëna të humbura nga përdorimi i shërbimeve, as për shërbimet e palëve të treta. Asgjë në këto kushte nuk e kufizon përgjegjësinë për dëmet e shkaktuara me dashje ose nga pakujdesia e rëndë, as të drejtat që konsumatorët kanë sipas ligjit. Për klientët e biznesit zbatohet përgjegjësia e përcaktuar në kontratën e tyre.

Mund të ndaloni së përdoruri shërbimet në çdo kohë dhe të na kërkoni të fshijmë llogarinë dhe të dhënat tuaja, siç shpjegohet te Fshirja e të dhënave. Mund të pezullojmë ose mbyllim një llogari që i shkel rëndë ose në mënyrë të përsëritur këto kushte, ose kur e kërkon ligji. Kontratat me klientët e biznesit përfundojnë siç përcaktohet në kontratë.

Si i përpunojmë të dhënat personale shpjegohet te Politika e privatësisë dhe Politika e cookies.

Këto kushte rregullohen nga ligji i Republikës së Shqipërisë. Mosmarrëveshjet zgjidhen nga gjykatat kompetente të Tiranës, përveçse kur ligji ju jep juve, si konsumator, të drejtën t’u drejtoheni gjykatave të vendit ku jetoni. Do të na vinte mirë ta zgjidhnim më parë bashkë çdo problem: shkruani në per@magusgroup.al.

Kur i ndryshojmë këto kushte, versioni i ri publikohet në këtë faqe me datën e përditësimit; për ndryshime të rëndësishme ju njoftojmë edhe në faqe dhe, nëse keni llogari, me email, para se të hyjnë në fuqi. Nëse vazhdoni t’i përdorni shërbimet pas kësaj, i pranoni kushtet e reja.

Magus Group Albania shpk · Linzë, Nd. 30, H. 31, Ap. 52, Dajti, 1040, Tiranë, Shqipëri · per@magusgroup.al · +355 45 30 13 88.